Yaylağında
Müəllif: Ululu Kərim
Mənbə: Qara Namazov (2013). Ozan-aşıq sənətinin tarixi (az). AMEA Folklor İnstitutu. Orijinal mənbədən 2016-04-23 tarixində arxivləşdirilib. Yoxlanılıb 2016-08-11.

Ay ağalar, möcüz gördüm,
Mən Keçilin yaylağında.
Süsən, sünbül, tər bənövşə,
Qız Keçilin yaylağında.

Gözəlləri bölük-bölük,
Dörd bir yanında var hörük,
Bilməm maraldı, ya əlik,
Qız Keçilin yaylağında.

Yaz olar, çıxallar dağa,
Bulud oynar, hava yağa,
Kəsəllər qurban sadağa,
Qız Keçilin yaylağında.

Üst yanı Toxluca qaya,
Axar-baxarı var çaya,
Gözəlləri ağca maya,
Qız Keçilin yaylağında.

Alt yanı Nursdu, Külüsdü,
Mollası yox, işi pisdi,
Kərim deyər məndən küsdü,
Qız Keçilin yaylağı da!