Çətindir (Teymur Kərimli)

Çətindir (14.07.2021) Müəllif: [[Müəllif:Teymur Kərimli|Teymur Kərimli]]

Doğulmağa nə var? Tutar mamaça;

Bu həyatın yaşamağı çətindir.

Düzü keçər gəzə-gəzə bəbə də –

Aşa bilmək ala dağı çətindir.

Aşiq olan sevgisində naz arar,

Bu qaydadır – qışa düşən yaz arar.

Həyalıya işarə vur – qızarar;

Həyasızın utanmağı çətindir.

İnsan oğlu bu həyatda şən gərək,

Fikri dərin, saf ürəyi gen gərək.

Ağnan qara bir-birinə tən gərək;

Qara bassın tamam ağı – çətindir.

İblis şəri Tanrı xeyrin haxlasa,

Əyri yollar düz yolları bağlasa,

Otuz il də yesir edib saxlasa,

Düşmən alsın Qarabağı – çətindir!

Yaz bağını boz sözünlə qurutma,

Söz mülkünü kimlər qurub, unutma.

Teymur, sözün zirvəsinə can atma –

Asta-asta en aşağı – çətindir...