İri pul

İri pul (23.05.2022) Müəllif: [[Müəllif:Teymur Kərimli|Teymur Kərimli]]

Bu dünyada mən üç gözəl bilirəm:

Biri sərvət, biri rüşvət, biri – pul!

Hər pula da gözəl demək olmayır –

Gözəllərin gözəlidir iri pul!

Kimsə qılmaz bu gözəlin tərkini,

O çevirər məhəbbətə hər kini.

Zəifi zor, gözəl edər çirkini,

Döndərməzmi bir pişiyə şiri pul?

Ərgən görən deyə bilməz: dul gözəl,

Heç olarmı ağasından qul gözəl?

Yar soruşdu: mən gözələm, pul gözəl?

Acıqlanıb çıxırdım ki: kiri! Pul!

Qəhrəmansan, şir gücü var qolunda,

Heyranların sağında, həm solunda.

Sərkərdəsən mutluluğun yolunda –

Düş qabağa, apar bizi, yeri, pul!

Tərtəmizdir, aydan – sudan arıdır,

Can candırsa, pul can ilə yarıdır!

Dünya həmin Nuh gördüyü qarıdır,

Bu qarının qocası pul, əri – pul!