Bəs kim yanacaq?

Bəs kim yanacaq? (21.04.2022) Müəllif: [[Müəllif:Teymur Kərimli|Teymur Kərimli]]

Sən yanmasan,

Mən yanmasam,

Biz yanmasaq,

Nasıl çıxar qaranlıqlar aydınlığa?

Nazim Hikmət

Yanmasaq biz bəşərin halına, bəs kim yanacaq?

Danmasaq biz şəri, həm fitnəni, bəs kim danacaq?

Uçmasaq ülvi səmalarda açıb şəhpəri biz,

Qanadı sınmış o qartal necə pərvazlanacaq?

Dev desək cırtdana istehza yoluyla, lağ ilə,

Bir gün axırda o cırtdan özünü dev sanacaq.

Yaxşılıq qanmayana bir kərə üz versək əgər,

Dolaşıb boynumuza, bir zəlitək sallanacaq.

O kabab ki, sənə minnətlə verərlər kafedə,

O kababdan eyidir evdəki bir kəllə-bacaq.

O qədər zülmə sitayiş elədi cinsi-bəşər,

O səbəbdəndir ədalət obadan düşdü qaçaq.

Söz xiridarları, Teymur, necə gör süfrə açıb,

Bəlkə bir bəndə qonaq oldu deyə biz də açaq…