Bax (Növrəs İman)

Eyni adda digər əsərlər üçün dəqiqləşdirmə səhifəsinə baxın.

Bax Müəllif: Növrəs İman

Mənbə: Novrəs İman. Seçilmiş əsərləri. (Toplayıb tərtib edəni: İslam Ələsgər) Bakı, "Səda", 2004. səh. 27

Bir "kün" deyib, bu dünyanı xəlq edən,
Nəzər eylə, sən bir bu zamana bax.
Belə zəlalətdə qalmışam nədən,
Olmuşam yad eldə mən əfsana bax.

Gedib ərş üzündə merac eyləyən,
Dəryayi-rəhməti bir-bir boylayan,
Haqqilən danşıb, kəlmə söyləyən,
Sən də mənim təki bir cavana bax.

Dar gündə ümidim, ya Şahi-Mərdan,
Yusifi Misirdə qurtaran dardan,
Nitq ver, meydanda qoyma sərgərdan,
Bir günahkar qulun bu İmana bax.