Bilənlər

Bilənlər (28.02.2021) Müəllif: [[Müəllif:Teymur Kərimli|Teymur Kərimli]]

Yarı əğyar bilibdir ki, mənə yar olmaz,

Mən dəxi anı kim əğyar bilibdir, bilirəm...

Məhəmməd Fuzuli

Hamını özüntək bilməyən bilmə;

Bəzi mətləbləri bilənlər də var.

Bilməyən dağ olsa, sakın, əyilmə;

Dünyada hər nə var, bilənlərdə var...

Vicdanın qulu ol, sözün ağası,

“Ağa” dediyinə olma ağ, asi.

Hər kəsdə olmaz ki Hatəm səxası –

Pay verib dərdinnən ölənlər də var...

Kinli tayfaların olmaz dinləri,

Qatil doğuracaq qatil genləri.

Deyirdin, qan tutar qaniçənləri –

Qandan sərxoş olub gülənlər də var.

Fələk yorulmaz ki, gərdişindədir,

Canlı ölülər var – gor dışındadır.

Dünya köhnə dünya! Öz işindədir –

Zəhəri dişində ilanlar da var...

Teymur, bu, həyatdı, hənək deyil ki!

Bezi də kəfəndi, bələk deyil ki!

Dünya başdan-başa mələk deyil ki –

Filan filan oğlu filanlar da var...