Bilmirəm (Aşıq Bəsti)

Eyni adda digər əsərlər üçün dəqiqləşdirmə səhifəsinə baxın.
Bilmirəm
Müəllif: Aşıq Bəsti
Mənbə: Azərbaycan aşıq şeirindən seçmələr, İki cilddə, I cild. Bakı, "Şərq-Qərb", 2005 (az). Orijinal mənbədən 2010-09-23 tarixində arxivləşdirilib. Yoxlanılıb 2016-08-06.

Uçubdu könlümün bürcü-barısı,
Neçə bənna ilə hörə bilmirəm.
Ağlamaqdan tor gəlibdi gözümə,
İşıqlı dünyanı görə bilmirəm.

Əyibdi qəddimi çərxi-zamana,
Qiymət qoyan yoxdu yaxşı-yamana,
Gədələr bəy olub girib meydana,
Bəs kim dözər bu dağlara, bilmirəm?!

Əzəl gündən qara gəlib ruzgarım,
Bu qəmü möhnətdən artıb azarım,
Qəlp çıxıb mətahım, yoxdu bazarım,
Bəstiyəm dərdimə çara bilmirəm.