Bu kitab
Müəllif: Araz Yaquboğlu
Sərraf Şiruyənin “İgid ölər, adı qalar” kitabına
Mənbə: Sərraf Şiruyə. “Hər görüş bir xatirədir” Bakı, “Nurlan”, 2007, səh.207

Əsirlərin yaddaşına yazılıb,
Tarixlərdə qalasıdı bu kitab.
Əsir düşən Kəlbəcərin, Göyçənin,
Qəlbi dağlı lalasıdı bu kitab.

Yazmısan hünərin hər igidlərin,
Cəsur Yelmar kimi pir igidlərin,
Hacı Rəhim kimi nər igidlərin,
Alınmayan qalasıdı bu kitab.

Ustad, əbəs uyduq bəhsə-bəhslərlə,
Əməli, amalı bəd nəfəslərə.
Vətəni hərraca qoyan kəslərə,
İti kəsər olasıdı bu kitab.

Arazam, könlümün çoxdu qubarı,
İz açıb əlimdə zəhmət qabarı,
Yana-yana oxuduqca “Yelmarı”,
Sannam, zəfər çalasıdı bu kitab.