Dəmir yumruq

Dəmir Yumruq (27.09.2021) Müəllif: [[Müəllif:Teymur Kərimli|Teymur Kərimli]]

Əgər bilmək dilərsənsə, DƏMİR YUMRUQ nədən doğmuş:

Dəmir yurddan, dəmir eldən, dəmir iradədən doğmuş!

Duman çökdürmək istərkən elin başın düşmənlər,

Yarıb zülmətləri çıxmış, günəştək zirvədən doğmuş!

Elin yaddaşı ölməz ki, həmişə dumduru, şəffaf,

Dədəm Qorqud kitabından, nağıl, əfsanədən doğmuş!

Gələndə dar günü yurdun, oyanıb canlanır yaddaş,

Deyərsən bəs çinarlardır, palıdlardır, çəmən doğmuş!

Anamızdır Vətən, ancaq hücum etdikdə namərdlər,

Xilaskar ərləri bil ki, Vətən əkmiş, Vətən doğmuş!

Xoş olsun halına yurdun, gəlib ilhama, qeyrətdən

Dəmir yumruqlu sərkərdə, müzəffər bir ərən doğmuş!

Sənin də adının əsli dəmirdir, Teymur, ancaq ki,

DƏMİR YUMRUQ vuran yerdə sənə həm bir qələm doğmuş...