Dil eşq yolunda zar olubdur
Dil eşq yolunda zar olubdur Müəllif: Abbasqulu ağa Bakıxanov |
Mənbə: Tərtib edəni: Zaman Əsgərli (2005). XIX əsr Azərbaycan şeiri antologiyası (az). Milli Kitabxana. "Şərq-Qərb". Orijinal mənbədən 2016-03-05 tarixində arxivləşdirilib. Yoxlanılıb 2016-08-13. |
Dil eşq yolunda zar olubdur,
Bir gül həvəsində xar olubdur.
Xunabə dönübdü rəngi-zərdim,
Bu gülşən üçün bahar olubdur.
Dövrani-fələk müxalif olmuş,
Can düşməni-ruzigar olubdur.
Dilbər qəmi, dustlar fəraqi,
Dərdim bir ikən həzar olubdur,
Mən etmə kəlamım olsa dilsuz,
Söz mənşəi pürşərar olubdur.
Xunin ciyərim bəsani-lalə,
Əfsurdəvü dağidar olubdur.
Qəm bihədü dərd banihayət,
Möhnət dəxi bişümar olubdur.
Hicran sitəmi alıb qərarım,
Gün nuri gözümdə tar olubdur.
Hicrində düşüb bəlayə, Qüdsi,
Sərgəştəvü biqərar olubdur.