Dil meylini bir türreyi-şəbgirə salıbdır
Dil meylini bir türreyi-şəbgirə salıbdır Müəllif: Mirzə İsmayıl Qasir |
Mənbə: Tərtib edəni: Zaman Əsgərli (2005). XIX əsr Azərbaycan şeiri antologiyası (az). Milli Kitabxana. "Şərq-Qərb". Orijinal mənbədən 2016-03-05 tarixində arxivləşdirilib. Yoxlanılıb 2016-08-13. |
Dil meylini bir türreyi-şəbgirə salıbdır,
Divanəyə bax, kim özünü girə salıbdır.
Nahəq yerə saldı özünü dami-bəlaya
Bu qana bulaşmış məni təqsirə salıbdır.
Könlüm yüzünün Kəbəsinin tövfinə getcək,
Şam əhli tutubdur onu, zəncirə salıbdır.
Əfsunkəri-çeşmin Hələbi-arizin içrə,
Çəkmiş həbəşi qulları təsxirə salıbdır.
Dün guşimə bir nalə səsi yetdi çəməndən,
Bu nalə mənim könlümü təsirə salıbdır.
Dil verdi sənin zülfi-pərişanına dilbər,
Xali-siyəhin Qasiri təzvirə salıbdır.