Doğar

Doğar (09.04.2021) Müəllif: [[Müəllif:Teymur Kərimli|Teymur Kərimli]]

Yaxşılıqdan yaxşılıq, pislikdən ancaq şər doğar,

Qum yeyər ilbiz, sədəfdən bax nasıl mərmər doğar!

Qəm yeyər aşiq, gözündən bağçaya qan-yaş tökər,

Qanlı yaşdan bağçada al qırmızı güllər doğar.

Nər salar meylin, maya eylər qəbul saf sevgini

Nər-maya cırtdan doğurmaz, nərdən ancaq nər doğar!

Dildə sevgi kəlməsin təkrar edən çoxdur, vəli –

Bir Əli eşqində can qurban edən Qənbər doğar!

Əqd edəndə ağ kağızla Şeyx Nizami xaməsi,

Leyli, Şirinlə Nüşabə, bir də həft peykər doğar.

Ay mələklər, qoymayın şeytanları toy qurmağa –

Şeytanın şadlıq günündən dünyada məhşər doğar…

Bilmək olmaz, boşmu çəkmiş zəhməti, yazmış qəzəl –

Teymurun kompüterindən bir də gördün – zər doğar!