Dolana-dolana (Ağ Aşıq Allahverdi)

Dolana-dolana (Ağ Aşıq Allahverdi) Müəllif: Ağ Aşıq Allahverdi

Mənbə: Niftalı Göyçəli. "Göyçə ustadları" (antologiya), I hissə (PDF) (az.). Bakı: "Elm və təhsil". 2017. ISBN 978-9952-8176-1-2. 2017-11-23 tarixində arxivləşdirilib (PDF). İstifadə tarixi: 2017-11-23.

Dağlar, səndən duman qalxar,
Çərxə dolana-dolana.
Göy guruldar, şimşək çaxar,
Çərxə dolana-dolana.

Tər çiçəklər ilməyindi,
Nərgiz-çəmən köynəyindi.
Duman çalman –diləyindi,
Çərxə dolana-dolana.

Ağ Aşıq tək havalısan,
El-obanın cəlalısan,
Bahar fəsli davalısan,
Çərxə dolana-dolana.