Fikir barışır ey Nəfs, varmı sözün gələcəyə?

Fikir barışır ey Nəfs, varmı sözün gələcəyə? (1997) Müəllif: RAUF CAVAD

Yaranıb Xəyal-keçmiş, baxmaq üçün gələcəyə!
Qurur Ümid Xəyal, kim gedəcək çün gələcəyə!

Yaşayır Ümid Sevgi ilə, min cür Arzu ilə
Fikir cəmlənir, gedir-baxır, bu gün gələcəyə!

Bəsləyir Vüsal Könüldə min dilək, min cür istək,
Eşq-Məhəbbət cuşə gəlir, şən-gülün gələcəyə!

Sevinc yaradır məqsəd, qanadlı əhval-Ruhiyə!
Fikir toplanır hədəfə, sürünün gələcəyə!

Görür gözlər Gözəli, bəzəyib güllər Gözəli,
Sevir Zaman gümanı, gəlin-görün gələcəyə!

Nədir baxır gizlin çırpınaraq yaxın uzağa?!
Fikir dolur qəlbə, gedin-bürünün gələcəyə!

Yaxşı baxış göz edir ağ-qara, bəbəyin rəngi,
Gözəl əməl şux dayanar, düzülün gələcəyə!

Uca əqlim Nur surəti, Gün-ay, il-qar bənzəri,
Fikir daşır, tökülür suya, üzün gələcəyə!

Sevgi Həsrətlə başlar, söz dil-qəmdə, Yar ürəkdə,
Ümid dayaq durar, bir qədər dözün gələcəyə!

Rauf Xəyal, Yardır, güc-qüvvət ver, Heyran İstəyə,
Fikir barışır ey Nəfs, varmı sözün gələcəyə?!