Gözəllər (Aşıq Cəfər)

Disambig.svg Eyni adda digər əsərlər üçün dəqiqləşdirmə səhifəsinə baxın.
Gözəllər
Müəllif: Aşıq Cəfər
Mənbə: Yusif Səfərov (2011). Naxçıvan aşıqları və el şairləri (az). Naxçıvan: "Əcəmi" NPB. 2017-10-05 tarixində arxivləşdirilib. 2017-10-05 tarixində istifadə olunub.


Al yaşıl geyinib çıxdı qarşıma,
Yeriyin naz ilə dəstə gözəllər,
Xudam sizi nə xoş gündə yaradıb,
Qurban sizin kimi dosta gözəllər.

Qəvvas olan duz çıxarır dərindən,
Aşiq olan keçər başı-sərindən,
Üçünüzü seçmərəm bir-birizdən,
Qaymaq dodaq, ağız püstə gözəllər.

Sizi mən eylərəm başımın tacı,
Həsrət könlüm gül camalın möhtacı,
Mən sizə qardaşam, siz mənə bacı,
Oldum dərdinizdən xəstə gözəllər.

Yəqin bilin var-yoxumu tökərəm,
Gözəllərin zəhmətini çəkərəm,
İsmim Aşıq Cəfər sizə nökərəm,
Xoş gəldiniz gözüm üstə gözəllər.