Gəldi (Qaracaoğlan)

Eyni adda digər əsərlər üçün dəqiqləşdirmə səhifəsinə baxın.
Gəldi (Qaracaoğlan)
Müəllif: Qaracaoğlan
Mənbə: Anar (1999). Min beş yüz ilin oğuz şeri. Antologiya, I kitab. (az). Bakı: "Azərbaycan". 2017-07-08 tarixində arxivləşdirilib. 2017-07-08 tarixində istifadə olunub.

Ala gözlərini sevdiyim dilbər,
Səni görməyəli görəsim gəldi.
Altın kəmər sıxmış incə belini
Usul boylarını sarasım gəldi.

Kiçiciksən gözəl, etmə bu nazı
Ciyərimə basdın atəşi, közü.
Başına düzmüsən gülü, nərgizi
Üzümü üzünə sürəsim gəldi.

Aladır gözlərin, siyahdır qaşın
Aradım cahanı, bulunmaz eşin.
Yaylanın qarından bəyazdır döşün
Yıxılıb üstünə öləsim gəldi.

Qaracaoğlan der ki: bilirəm səni
Eylədim yolunda qurban bu canı.
Qoynunda bəslənən heyvanı, narı
Çözüb düymələrin dərəsim gəldi.