Gah bu çərxi-fələk aləmə tufan gətirər

Gah bu çərxi-fələk aləmə tufan gətirər Müəllif: Hacı Zeynalabdin Şirvani

Gah bu çərxi-fələk aləmə tufan gətirər,
Gah iyman evinə seyli-firavan gətirər.

Gah basar bağrına bülbül yerinə zağü zəğən,
Gah şikar eyləməyə alıcı tərlan gətirər.

Gah atar kin ilə İbrahimi Nəmrud oduna,
Gah Mina dağına İsmaili qurban gətirər.

Gah Yaqubi edər sakini Beyt ül-Əhzan,
Gah satar Yusifini, möhnəti-zindan gətirər.

Gah fironə verər nüxvətü xəllaqiyyət,
Gah qərq etməyunə Musiyi-İmran gətirər.

Gah nəleyni-Məhəmmədlə verər ərşə bəzək,
Gah onun məsnədinə bir neçə heyvan gətirər.

Gah verər Şiri-Xuda dəstinə Xeybər fəthin,
Gah qolu bağlı onu məscidə nalan gətirər.

Gah salıb şuri-müxaliflə Hizac içrə nəva,
Gah İraq içrə Hüseyn qətlinə fərman gətirər.

Ali-Süfyanə verər izzət üçün təxti-tila,
Ali-Peyğəmbər üçün naqeyi-üryan gətirər.

İzzətü zillətinə baxma onun, ey Təmkin,
Gah dünyaya xəzan, gah gülüstan gətirər.