Kəsildi (Aşıq Alı)

Eyni adda digər əsərlər üçün dəqiqləşdirmə səhifəsinə baxın.

Kəsildi (Aşıq Alı) Müəllif: Aşıq Alı

Mənbə: Niftalı Göyçəli. "Göyçə ustadları" (antologiya), I hissə (PDF) (az.). Bakı: "Elm və təhsil". 2017. ISBN 978-9952-8176-1-2. 2017-11-23 tarixində arxivləşdirilib (PDF). İstifadə tarixi: 2017-11-23.

Fərzəndi-şərəfim köçdü dünyadan,
Fələyin boynuma qəhri kəsildi!
Necə əl götürüm həmdu-sənadan,
Şəkər dəhanımda zəhər kəsildi!

Şərəfim, şöhrətim, oydu pənahım,
Xaliqin önündə nəydi günahım?
Ərşə büləndi o, oldu amanım,
Həyat çeşməsinin bəhri kəsildi!

Nagah qəza gəldi məntək halıya,
Fəryadım elləri oda qalıya!
Ümid çeşməsiydi yazıq Alıya,
Çeşməsi qeyb oldu nəhri kəsildi!