Növhə (M.Ə.Rəsulzadə)

Növhə (1906) Müəllif: Məhəmməd Əmin Rəsulzadə

Mənbə: “Dəvət-Qoç” qəzeti. №14. 20 iyul 1906. Məhəmməd Əmin Rəsulzadə Əsərləri - I cild (PDF) (az.). 1 may 2024 tarixində arxivləşdirilib (PDF).

Yenə fitnə alıb meydan,
Müftinlər sürür dövran.
Gözəl Qafqaz olur viran.
Qalır hər kəs buna heyran,
                Tərəhhüm^[1] eylə ya sübhan,
                Amandır, dada yet rəbbi!

Nədir bu qan, nədir möhnət^[2]?!
Ki tutmuş bizləri nükbət^[3].
Yapır «şeytan» işi nüsrət^[4].
Gedir əldən tamam qeyrət,
               Xudaya! Et bizə rəhmət!
               Amandır, dada yet rəbbi!

Hökumət mayeyi ifsad^[5],
Ki qan içməklədir mötad^[6].
Bu cəngi eylədi icad,
Ki etsin bizləri bərbad.
               İlahi sən elə imdad!
               Amandır, dada yet rəbbi!

Tökülmüş bu qədər qanlar.
Deyilmi bəs bu qurbanlar?
Nə vəhşilikdir, ixvanlar^[7]!
Tələf əmlak olur, canlar
               Olub divanə insanlar.
               Amandır, dada yet rəbbi!

Cəmaət hiylə qurbani,
Olub şad etdi «şeytani».
Fəramuş etdi^[8] imani.
Nəhayət sandi dünyanı.
              Axıtdı nahəq al qani.
              Amandır, dada yet rəbbi!

Qədim qonşu, iki millət,
Dolanmış mehrlə^[9] hər vəqt.
Nə üz verdi ki, bu hörmət,
Mübəddəl oldu^[10] bər xirəd^[11]?
              Nə dövrandır bu, nə fürsət?!
              Amandır, dada yet rəbbi!

Sözlük

1. Tərəhhnüm – rəhm etmə, yazığı gəlmə
2. Möhnət – müsibət, bəla
3. Nükbət – bədbəxtlik
4. Nüsrət – 1. zəfər; 2. kömək
5. Mayeyi ifsad ‒ Fitnə-fəsad salan "katalizator"
6. Mötad – alışıldığı, bilindiyi kimi
7. İxvan – qardaş
8. Fəramuş etmək – unutmaq
9. Mehr – sevgi, mehribanlıq
10. Mübəddəl olmaq - dəyişmək, əvəz olmaq
11. Bər xirəd – aparıcı, rəhbər fikir