Niyə gəlmədin

Niyə gəlmədin Müəllif: Əhməd Cavad

Mənbə: Əhməd Cavad. Seçilmiş əsəsrləri. Bakı, "Şərq Qərb nəşriyyatı", 2005. səh.120

“Mey”dən könül küsdü, sana sarıldı,
“Gəldim ” deyib durdun, niyə gəlmədin?
Andım səni, bana “ney”lər darıldı,
“Bildim ” deyib durdun, niyə gəlmədin?!

Artıq bənim yarım deyil xəyalı,
Heç bir qaşa bənzətmərəm hilalı;
Bir dəliyəm sana meftun olalı,
“Bildim ” deyib durdun, niyə gəlmədin?

Bən inləməm hər bir ufaq yaradan,
Bənim qönçəm gülmüş bahar olmadan.
“Birləşin” dedi ki, bizi yaradan,
“Bildim” deyib durdun, niyə gəlmədin?!

Pərişandır könül, pərişanam bən,
Gözəl qız, qoşarsan, dərdimi bilsən!
Gəl, bu yad ellərdə şənliyim ol sən!
“Gəldim” deyib durdun, niyə gəlmədin?!

Qələm sağər, deməz, etməz istiğfar,
Səninçün sərxoşdur, saçılar yazar.
Bən səni sevmişəm, bunu kim pozar?
“Bildim ” deyib durdun, niyə gəlmdin?!