Olu, ya rəb, bu ki, mən rövzeyi-rizvanə gedəm

Olu, ya rəb, bu ki, mən rövzeyi-rizvanə gedəm Müəllif: Molla Məhəmməd Zövi

Mənbə: Tərtib edəni: Zaman Əsgərli. "XIX əsr Azərbaycan şeiri antologiyası" (PDF). Milli Kitabxana (az.). "Şərq-Qərb". 2005. 2016-03-05 tarixində arxivləşdirilib (PDF). İstifadə tarixi: 2016-08-13.

Olu, ya rəb, bu ki, mən rövzeyi-rizvanə gedəm?
Rahəti-canım üçün xidməti-Şirvanə gedəm?

Qurtarıb məhbəsi-səhrayi-Muğan cövründən,
Rəşki-firdovsi-bərin sahəti-Şirvanə gedəm?

Xarü xaşakü qarağani-Muğandan qutarıb,
Gülü gülzari-Şəmaxidə gülüstanə gedəm?

Qurtarıb səbhəşümar olmaqdan məsciddə,
Səhni-meyxanədə nuş etməyə peymanə gedəm?

Təngə gəldim bu riyaməslək olan zahiddən,
Ey xoş ol bəzmi-səfa, məşribi-rindanə gedəm?

Məscid əhlində ki, yox zövq, xudaya, nolu bir
Guşeyi-meykədədə məclisi-ürfanə gedəm?

Zövi tək bangi-müəzzindən olub asudə,
Nəğmeyi-taru dəfü bərbəti-xoşxanə gedəm.