Oxşa məni

Oxşa məni Müəllif: Şair Məmmədhüseyn

Mənbə: Şair Məmmədhüseyn. "Nur çeşməsi" (PDF) (az.). Elm və təhsil. 2018. İstifadə tarixi: 2018-09-20.

Mehriban sənəmim, şöhrətim mənim,
Aşiqinəm dərdim bil, oxşa məni.
Hicranın güclüdür dözməyir qəlbim,
Astadan üzümə gül, oxşa məni.

Özün etdin məni dərdə mübtəla,
A qaşları qara, a gözü ala.
Qoyma bu dərd məndə ömürlük qala,
A bəstə boy, şirin dil, oxşa məni.

Mail olub səndə bu yetkin çağa,
Məmmədhüseyn canın verdi sadağa.
Kim can deməz sənin kimi qonağa,
Qal yanımda bütün il, oxşa məni.