Qalanmalıyam

Qalanmalıyam Müəllif: Ağ Aşıq Allahverdi

Mənbə: Niftalı Göyçəli. "Göyçə ustadları" (antologiya), I hissə (PDF) (az.). Bakı: "Elm və təhsil". 2017. ISBN 978-9952-8176-1-2. 2017-11-23 tarixində arxivləşdirilib (PDF). İstifadə tarixi: 2017-11-23.

Taleyim belədir yaranan gündən,
Nahaqdan odlara qalanmalıyam.
Nə qədər əlləşəm, var-dövlət yığam,
Bir yandan çapılıb, talanmalıyam.

Ürəyimdən od düşübdür üstümə,
Heyran-heyrab yaxanlar var tüstümə.
Təndir bilib sığınırlar istimə,
Belə dolanmışam, dolanmalıyam.

Qəlbimi qanadan yar yarasıdır,
Bəxtimin yuxusu məni sarsıdır.
Ağ Aşıq haqq üçün hey yanasıdır,
Od oğluyam, oda qalanmalıyam.