Quran (Məmmədhəsən Qəni oğlu və Tariyel Bilal oğlu tərcüməsi)/İNFİTAR SURƏSİ

Quran. İNFİTAR SURƏSİ Tərcüməçilər: Məmmədhəsən Qəni oğlu və Tariyel Bilal oğlu

(on doqquz ayədən ibarət Məkkə surəsi)

Mərhəmətli, rəhmli Allahın adı ilə!

1 Səma parça-parça olanda,

2 ulduzlar dağılıb səpələnəndə,

3 dənizlər daşıb qarışanda,

4 qəbirlər çevriləndə,

5 hər kəs qabaqcadan nəyi tədarük edib, nəyi sonraya saxladığını biləcəkdir.

6 Ey insan, səni öz səxavətli Rəbbinə qarşı tovlayıb aldadan nədir?

7 (O Rəbbinə) ki, səni xəlq edib, düzəldib bir biçimə salıbdır.

8 sənə istədiyi şəkli veribdir.

9 Yox! Siz haqq-hesab gününü yalan hesab edirsiniz.

10 Axı sizin üzərinizdə nəzarətçilər,

11 möhtərəm yazarlar [mələklər] vardır.

12 Onlar sizin nə etdiklərinizi bilirlər.

13 Sadiq möminlər, həqiqətən də Nəim [cənnət] içərisində,

14 günah işlədənlər isə, əlbəttə ki, cəhənnəm içərisində olarlar!

15 Onlar haqq-hesab günü oraya daxil olarlar

16 və onlar ondan yayına bilməzlər.

17 Haqq-hesab gününün nə olduğunu sən haradan biləsən?

18 Axı haqq-hesab gününün nə olduğunu sən haradan biləsən?!

19 O günü heç kəs heç kəsə bir fayda verə bilməz, o günü əmr ancaq Allahındır.