Quran (Məmmədhəsən Qəni oğlu və Tariyel Bilal oğlu tərcüməsi)/TƏKVİR SURƏSİ

Quran. TƏKVİR SURƏSİ Tərcüməçilər: Məmmədhəsən Qəni oğlu və Tariyel Bilal oğlu

(iyirmi doqquz ayədən ibarət Məkkə surəsi)

Mərhəmətli, rəhmli Allahın adı ilə!

1 Günəş bükülüb yumrulananda [sönəndə],

2 ulduzlar qopub töküləndə,

3 dağlar hərəkətə gətiriləndə,

4 on aylıq boğaz dəvələr başlı-başına buraxılanda,

5 vəhşi heyvanlar bir yerə toplananda,

6 dənizlər daşıb qarışanda,

7 ruhlar (bədənlərə) qovuşdurulanda,

8 diri-diri basdırılan qızdan soruşulanda ki,

9 hansı günaha görə öldürülübdür,

10 səhifələr [əməl dəftərləri] acılanda,

11 səma qoparılıb çıxarılanda,

12 cəhənnəm odu qalananda

13 və cənnət yaxınlaşdırılanda

14 hər kəs nə tədarük etdiyini biləcəkdir.

15 Yox! And içirəm görünüb batanlara [ulduzlara],

16 cövlan edib gizlənənlərə [səyyarələrə],

17 qaranlıqlaşan gecəyə,

18 ağaran dan yerinə!

19 Həqiqətən də, bu [Quran], möhtərəm bir elçinin (Cəbrailin gətirdiyi) kəlamdır.

20 (O elçi ki,) güclüdür, ərş sahibi yanında hörmətlidir.

21 İtaət edilən, həm də etibarlıdır.

22 Həqiqətən də sizin yoldaşınız bir dəli-divanə deyildir.

23 And olsun ki, o, onu [Cəbraili] aydın üfüqdə görmüşdür

24 və o, qeyb barəsində xəsislik etmir [vəhyi insanlara bildirir].

25 Bu, daşqalaq olunmuş şeytanın sözü deyildir.

26 Elə isə bəs siz hara gedirsiniz?!

27 Bu [Quran], aləmlər üçün öyüd-nəsihətdən, xəbərdarlıqdan başqa bir şey deyildir.

28 Sizlərdən düz (yolda) olmaq istəyənlər üçün də.

29 Aləmlərin Rəbbi Allah istəmədikcə, siz də istəyə bilməzsiniz.