Quran (Məmmədhəsən Qəni oğlu və Tariyel Bilal oğlu tərcüməsi)/TARIQ SURƏSİ

Quran. TARIQ SURƏSİ Tərcüməçilər: Məmmədhəsən Qəni oğlu və Tariyel Bilal oğlu

(on yeddi ayədən ibarət Məkkə surəsi)

Mərhəmətli, rəhmli Allahın adı ilə

1 And olsun səmaya və gecə gələnə!

2 Gecə gələnin nə olduğunu sən haradan biləsən?!

3 O, (qaranlıqlara) nüfuz edən bir ulduzdur.

4 Həqiqətən də hər kəsin üzərində bir gözətçi vardır!

5 Qoy insan nədən xəlq olunduğuna bir baxsın.

6 O, elə bir təzyiqlə axan sudan [nütfədən] xəlq olunub ki,

7 o, bel sümüyü və döş sümükləri arasından çıxır.

8 Həqiqətən də O, insanı (öləndən sonra) bir də diriltməyə qadirdir.

9 Sirlərin ortaya çıxarılacağı günü

10 onun [insanın] nə bir gücü, nə də bir kömək edəni olar.

11 And olsun qaytarıb endirməyə (yağmuru) olan səmaya!

12 And olsun yarılan yerə!

13 Bu [Quran], həqiqətən də (haqq ilə batili) ayırd edən bir kəlamdır.

14 O, bir əyləncə vasitəsi deyildir.

15 Onlar [kafirlər] hiylə qururlar,

16 Mən də hiylələrinə qarşı tədbir qururam.

17 Sən kafirlərə möhlət ver! Onlara bir az da möhlət ver!