Sıraynan (Şair Ağacan)

Sıraynan Müəllif: Şair Ağacan

Mənbə: Azərbaycan Aşıqlar Birliyi (2020). Ustad nəfəsli saz-söz ərməğanı (az). “Zərdabi Nəşr” MMC nəşriyyatı. Orijinal mənbədən 17 iyun 2023 tarixində arxivləşdirilib. Yoxlanılıb 17 iyun 2023.

 
Havalanıb dəli könlüm kəşt eyləyir haraynan,
Dərdi deyim yaz dəftərə sən qələmi qaraynan,
Aldanmaynan bivəfaya dünya karvansaradır,
Çox dolub, çox boşalıbdı, düzülübdü sıraynan.

Adam var ki, düşünməyir, çəmsi-qəmər, ay nədir,
Kimi eşqə talıb olur, kimi atın oynadır,
Kimi şeytan, kimi iblis, kimi fəsad qaynadır,
Adam var ki, din-imanı alıb-satır paraynan.

Ağacanam tanıyıram Quranı, Peyğəmbəri,
Var dilimin ləşgəridir ərşin-kürşün ləngəri,
Alimi yox, mollanı yox, qazini çağır bəri,
Mən öləndə götürsünlər qoy Yasini suraynan!