Sirlər açıldı

Sirlər açıldı (29.11.2020) Müəllif: [[Müəllif:Teymur Kərimli|Teymur Kərimli]]

Zülmət gecə keçdi, yenə dan ulduzu çıxdı,

Astarda qalan sirlər açıldı, üzü çıxdı.

Düşmən ayağında qurumuş çöllərə bax sən:

Qoynunda Vətən oğlunu gördükdə su çıxdı.

Anqırdı həmən hay dığa, hay vermədi kimsə,

Tək qaldı yağı, yandı-yaxıldı, közü çıxdı!

Səngərdə “bro-bro” eləyib qürrələnirdi,

Söylərdi “qoçam”, amma qaçanda quzu çıxdı...

Düşmən xılı derdi özünə “məğlubedilməz” –

YUMRUQDAR ona zərbə vuranda tozu çıxdı!

Donquz balası qaçdı özü, əcdadı qaldı,

Məscidlərimizdən yağının donquzu çıxdı.

Gördünmü, qiyamətə qisas qalmadı, Teymur, –

Düşmən kürəyindən QOÇumun buynuzu çıxdı!