Tükəzban

Tükəzban Müəllif: Varxiyanlı Aşıq Məhəmməd

Mənbə: Azərbaycan aşıq şeirindən seçmələr, İki cilddə, I cild. Bakı, "Şərq-Qərb", 2005. ISBN 9952-418-41-5

Bülbüllər ötüşüb naz ilə oynar,
Yanaqların oxşar gülə, Tükəzban!
Cığalar qıvrılıb üz ilə oynar,
Nə sığal veribsən telə, Tükəzban!

Şirin canım yar yolunun xərabı,
Xəstə cismim ayağının türabı1,
Məst eylər aşığı ləbin şərabı,
Qənd əzibsən dişə, dilə, Tükəzban!

Məhəmmədəm, indi sənə uyaram,
Mən arifəm, işarədən duyaram,
Vəsf eyləyib ölkələrə yayaram,
Tərifin dağılar elə, Tükəzban!