Xabi-qəflətdən oyansun eşqi-dildar istəyən

Xabi-qəflətdən oyansun eşqi-dildar istəyən Müəllif: Həbibi

Mənbə: Həbibi. "Şeirlər" (PDF) (az.). "Şərq-Qərb". 2006. 2017-04-27 tarixində arxivləşdirilib (PDF). İstifadə tarixi: 2017-04-27.

Xabi-qəflətdən oyansun eşqi-dildar istəyən,
Bülbüli-şuridə olsun vəsli-gülzar istəyən.

Ney kimi bağrın dəlib, hər dəmdə nalan eyləsün,
Dərdilə yansın, yaxılsın vəsləti-yar istəyən.

Aşiqin yanmaqdan özgə dərdinə dərmanı yox,
Yanmağa pərvanə bolsun şəmi-rüxsar istəyən.

Aşiq oldur canü dildən dərd qıldı ixtiyar,
Dərdinə dərman buldu dərdi təkrar istəyən.

Can verib bir can üçün yansa Həbibi, qəm deyil,
Masəvadan fariğ oldu vəsli-dildar istəyən.