Yanlış naxış deyil
| Yanlış naxış deyil Müəllif: Ənvər Çingizoğlu |
| "Mədəniyyət" qəzeti, "Soy" dərgisi |
Azərbaycan ədəbiyyatı, bu ağsaçlı ədəbiyyatın ağır-azman simaları, onların yaşam yolu, yaradıcılığı yetərincə öyrənilib. Amma bəzi yanlışlıqlar hələ də mövcuddur. Biz bu yazımızda bir ədəbi şəxsin yaşam yoluna qaranlıq salan "zülmət" xətanı aydınlatmağa çalışacağıq.
Bu şəxsiyyət yazıçı-dramaturq, publisist, Azərbaycanda Avropa stili teatrın banisi, Azərbaycan realist faciə janrının yaradıcısı Nəcəf bəy Vəzirovdur. Bəs, bu görkəmli yazarın yaşam yolundakı xəta, daha doğrusu qondarma, quraşdırma xəta nədən ibarətdir? Öncə qeyd edək ki, bu xəta Vəzirovun yaradıcılığına zərrə qədər xələl gətirməyib. Lakin həqiqət naminə bu səhvi düzəltməliyik.
Vəzirovdan, onun ədəbi irsindən bəhs edən tədqiqatçılar, ədəbiyyatşünaslar və bioqraflar göstərirlər ki, Nəcəf bəy Zümrxaç kəndinin mülkədarı Qulu bəyin nəvəsi, Fətəli bəyin oğludur. Bu şəcərədə bir yanlışlıq var. O yanlışı düzəltmək üçün Nəcəf bəyin yüksələn şəcərəsini yazımızda verməyi gərəkli bildik.
Ibrahimxəlil xan Sarıcalı-Cavanşirin Mirzə Əliməhəmməd ağa Sofuoğlu adlı bir müşaviri vardı. Mirzə Əliməhəmməd ağa Qarabağ xanlığının ictimai-siyasi həyatında önəmli rol oynamışdı. Bir çox qonşu dövlətlərə elçilik missiyasını yerinə yetirmişdi. Belə missiyalardan biri də hərbi yardım üçün 1789-cu ildə Osmanlı dövlətinə, Ərzurum valisi Abdulla paşanın yanına getməsi idi. Bu elçilik sonralar onun ölümünə nədən oldu. 1797-ci ildə Ağaməhəmməd şah Qovanlı-Qacar Qarabağı, onun başkəndi Şuşa şəhəri tutanda Ibrahimxəlil xanın vəzirlərindən altı nəfəri edam etməyi əmr vermişdi. Baş vəzir Molla Pənah ağa Salahlı – Qazax zindana atılmış, Mirzə Əliməhəmməd ağa seyid olduğuna görə şal ilə boğulmuş (türk törəsinə görə nəcib qanı tökülməz), digər beş nəfər çarmıxa çəkilmişdi.
Mirzə Əliməhəmməd ağanın Mir Şahməhəmməd ağa, Mirzə Xanməhəmməd ağa və Mirzə Cəfər ağa adlı oğulları vardı.
Mirzə Əliməhəmməd ağanın ikinci oğlu Mirzə Xanməhəmməd ağa Ibrahimxəlil xanın nədimi olmuşdu. Onun ölümündən sonra oğlu Mehdiqulu xana xidmət etmişdi. Mehdiqulu xan Mirzə Xanməhəmməd ağanın əməyini, səylərini dəyərləndirmiş, xanlıq ərazisində ona bir neçə kənd bağışlanmışdı.
Mirzə Xanməhəmməd ağanın Mirzə Ismayıl bəy, Mirzə Rüstəm bəy, Mirzə Fətəli bəy, Mir Nəsir bəy və Məşədi Mir Şükür bəy adlı oğulları vardı.
Mirzə Xanməhəmməd ağının üçüncü oğlu Mir Fətəli bəy 1811-ci ildə Şuşa şəhərində anadan olmuşdu. Mükəmməl mədrəsə təhsili almışdı. Mülkünü, şəxsi təsərrüfatını idarə etməklə dolanırdı.
Mir Fətəli bəy Mirzə Həsən bəy Mehmandarovun qızı Mina xanım ilə dünya evinə girmişdi. Nəcəfqulu bəy (Nəcəf bəy Vəzirov), Məmməd bəy adlı oğulları, Güllü xanım və Aftab xanım adlı qızları vardı.
Mir Fətəli bəyin böyük oğlu Nəcəfqulu bəy 1853-cü ildə Şuşa şəhərində doğulmuşdu. Ikiilik rus-müsəlman məktəbini bitirəndən sonra Bakı şəhərinə köçmüşdü. 1868-ci ildə Bakı Real Məktəbinə qəbul olmuşdu. 1874-cü ildə real məktəbi bitirib, Sankt-Peterburq şəhərinə yollanmışdı. Uğurla sınaqlardan çıxıb universitetə qəbul olmuşdu.
Şəhərin sərt iqlimi Nəcəf bəy Vəzirovun səhhətinə zərər verdiyindən Moskva şəhərinə dəyişmişdi. O, burada Petrovski adını Kənd Təsərrüfatı Akademiyasına girmişdi. 1878-ci ildə akademiyanı bitirib Vətənə dönmüşdü…
Gördüyünüz kimi, Nəcəf bəy Vəzirovun şəcərəsində Qulu bəy adlı adam yoxdur. "Qulu bəy" hansısa məsuliyyətsiz, dərin-dolğun tədqiqat aparmamış ədəbiyyatçının yanlışıdır ki, neçə illərdir ünlü yazar Nəcəf bəy Vəzirovun bioqrafiyasında özünə yer tapıb. Hər halda bu yanlış naxış deyil.